Arnaut Danièl, que ne passèt pas necèira de signar sos cants de son petit nom, es tanben coneishut per de las multiplas perifrasas. Dishut miglior fabbro per Dante, apuei gran maestro d’amor per Petrarca, a còps « corifèu dau trobar ric », d’autes còps « bon obrèir de las letras », nòste poèta apareish coma indissociable de las suas cançons.
Be son nombrós los princes de Blaia qui portèren lo nom de Jaufre Rudèl hasent atau malaisida l’identificacion dau Jaufre Rudèl trobador. Quaus qu’èstin los elements biografics de la vita dau poèta de Blaia, ne saberén çanjar los tèrmes de sa legenda qui, plan mei que sa poesia, hasut la posteritat dau trobador.
Tota classificacion en literatura, e mèi que mèi a l’Atge Mejancèir, non sauré estar perfeitament destermiada e còp a còp, be n’es malaisit de sapcher a-de-bon a quala « escòla » restacar tau o tau trobador o tau o tau de sos poèmas. Los teoricians dau trobar distinguen egau tres estiles màgers.
Designan per trobar tanplan l’ensemble de la produccion trobadoresca coma l’acte de crear pròpi aus trobadors. ‘Quò’s dau vèrbi trobar ençà que ven lo mòt trobador. Un trobador es un poèta amèi un musician de l’Atge Mejancèir que sa lenga de predileccion es l’occitan, o lenga d’òc.
